धुलिखेल, २५ धुलिखेलः पनौती नगरपालिकाले यो वर्षका लागि भैँसीको पाडी वितरणको काम सकाएको छ । पालिकाले शुक्रबार वडा नम्बर १२ भूमिडाँडाका ५० जना किसानलाई पाडी वितरण गरेर कार्यक्रम सकाएको हो । यो वर्ष नगरपालिकाले ३ सय वटा पाडी वितरण गरेको नगरप्रमुख भिमप्रसाद न्यौपानेले जानकारी दिए ।

आफ्नो बार्षिक नीति तथा कार्यक्रममै भैँसी जोगाउ अभियान चलाउने योजना समावेश गरेको नगरपालिकाले पुस दोस्रो साता वडा नम्बर १ का ४२ जना किसानलाई भैसीको पाडी वितरण गरेर कार्यक्रमको सुरुवात गरेको थियो । “भैँसी सरंक्षण, संवद्र्धन र अनुवंशिक सरंक्षणका लागि पनौती नगरपालिकाको अभियान“ भन्ने मूल नाराका साथ वडा नम्बर १ देखि वडा नम्बर १२ सम्म भैँसीको पाडी वितरण गरिएको हो ।

नगरपालिकाले वडा नम्बर १ मा ४२ वटा, २ मा ३५ वटा, ३ मा ३० वटा र सात नम्बर वटामा ३ वटा मात्रै पाडी वितरण गरेको छ । त्यस्तै वडा नम्बर ४, ५, ६, ८, ९, १० र ११ मा २०/२० वटा भैँसीको पाडी वितरण गरिएको छ ।

पाडीको माग गर्दै नगरपलिकाभित्रका बाह्र वटा वडाका एक हजार किसानले निवेदन दिएका थिए । निवेदन दिएका तर यो वर्ष नआएका किसानलाई अर्को वर्ष त्यहि निवदेनका आधारमा पाडी वितरण गरिनेछ । नगरपालिकाले पाडीको बिमा, औषधी उपचार खर्च र सुत्केरी भत्ता पनि प्रदान गर्दै आएको छ ।