काभ्रे: काभ्रेको नमोबुद्ध नगरपालिमा अख्तियार दुरुपयोग अनुसन्धान आयोगको टोलीले छापा मारेको छ । राजस्व हिनामिनाको समाचार सार्वजनिक भएपछि अख्तियारको टोलीले आज छापा मारेको हो । तर नगरपालिकाले भने राय माग्न मात्रै अख्तियारको टोली आएको बताएको छ । अख्तियारको टोलीले कागपत्र नियन्त्रणमा लिएको उच्च स्रोतले बतायो ।

नगरपालिकाले राजस्व हिनामिना गरेको अभियोगमा ८ जना कर्मचारी माथि छानविन गर्न समिति समेत गठन गरेको छ । भुकम्पप्रभावितलाई नदीजन्य सामग्रीमा छुट दिने नाममा राजस्व अतियमितता भएको पाइएको हो । नगरपालिकाले पनि भूकम्पप्रभावितलाई छुट दिइएको स्वीकार गरेको छ ।

यसैबीच छानविन समितिका तीन जना सदस्यले सामुहिक राजीनामा दिएका छन् । समिति सदस्य सञ्जीव ढकाल, धर्म सिं लामा र राजीव श्रेष्ठले विज्ञाप्ति निकालेर राजीनामा दिएको बताएका हुन् । नगरपालिकाले माघ १५ गते छानविन समिति गठन गरेको थियो । छानविन समितिका सदस्य माथि नै प्रश्न उठेपछि नैतिक रुपमा राजीनामा दिएको उनीहरुले बताएका छन् ।

नगरकार्यपालिकाले लेखा समितिका संयोजक समेत रहेका वडा नम्बर १० का वडाध्यक्ष रामकृष्ण उपाध्यायको अध्यक्षतामा ५ सदस्यीय छानविन समिति गठन गरेको थियो । समितिका सदस्यमा वडा नम्बर ६ का अध्यक्ष कुलप्रसाद न्यौपाने, वडा नम्बर २ का अध्यक्ष ढकाल, वडा नम्बर ७ का अध्यक्ष लामा र सदस्य सचिवमा कम्प्युटर अपरेटर श्रेष्ठ हुनुहुन्छ ।