धुलिखेल, २३ माघः सिन्धुपाल्चोक जिल्लाको लिसंखु पाखर गाउँपालिकाले तीन वडामा निःशुल्क आँखा शिविर कार्यक्रम सकाएको छ । पालिकाले सोमबार वडा नम्बर १ ठूलोधादिङ, मंगलबार वडा नम्बर २ लिसंखु र हिजो वडा नम्बर ३ वाफलमा निःशुल्क आँखा शिविर सञ्चालन गरेको हो ।

तीन वटै वडाको शिविरमा ३ सय ८० जनाले आँखा परीक्षण गराएका थिए । ती मध्ये ४८ जनामा मोतियाविन्दुको समस्या देखिएको पालिकाका स्वास्थ्य संयोजक राजु बस्नेतले जानकारी दिए । २८ जनालाई भने मोतिया विन्दुको अप्रेसनका लागि बिहीबार बनेपा स्थित रेयुकाई एईको मासुनागा अस्पताल पठाइएको छ ।

पालिकाले यसअघि वडा नम्बर ४ को सिक्रेमा पुस ६ गते रेयुकाई अस्पतालकै प्राविधिक सहयोगमा निःशुल्क आँखा विशिर आयोजना गरेको थियो । बाकी रहेका तीन वटा वडामा भने अर्को महिना आँखा शिविर हुने स्वास्थ्य संयोजक बस्नेतले बताए । पालिकामा ७ वटा वडा रहेका छन् ।