धुलिखेल, १७ माघः काभ्रेको पाँचखाल नगरपालिकाको छैटौँ नगरसभाले वन ऐन पारित गरेको छ । शुक्रबार बसेको छैटौँ नगरसभाले वन ऐन पारित गरेको हो । ऐन पारित भएपछि वन जन्य सामाग्री निकासी गर्ने बाटो समेत खुलेको छ ।

ऐनमा वनमा इको टुरिजम सञ्चालन गर्न सक्ने ब्यवस्था समेत गरिएको प्रवक्ता सञ्जय लामाले जानकारी दिए । त्यस्तै ऐनमा सामुदायिक वनको आर्थिक उपार्जन, सरकारी वनको संरक्षण र निजी वन प्रवद्र्धन गर्ने बारेपनि उल्लेख गरिएको छ ।

ऐन, कानुन र नीति, नियम बनाउने र संशोधन नगर्ने सभाको रुपमा लिइने हिउँदे अधिवेशनले विभिन्न ४ वटा ऐन संशोधन गरेको छ । यसअघि पारित भएका शिक्षा, सहकारी, आर्थिक र पलाञ्चोक भगवती विकास कोष सञ्चालन गर्न बनेको ऐन संसोधन गरिएको प्रवक्ता लामाले बताए ।