धुलिखेल, ७ माघः काभ्रेको पनौती नगरपालिकामा रहेको पनौती जुनियर जेसिजले दुई सदनात्मक संसदीय बहस प्रतियोगिता हिजो सम्पन्न गरेको छ । नेतृत्वका लागि बहस भन्ने मूल नाराका साथ आयोजना गरिएको यो कार्यक्रम काभ्रेको पहिलो कार्यक्रम हो ।

कार्यक्रमलाई पनौती नगरपालिकाले आर्थिक सहयोग उपलब्ध गराएको थियो भने द रुलर लाईब्रेअरीले सहकार्य गरेको थियो । पनौती नगरपालिकाको सभाहलमा सोमबार र मंगलबार भएको उक्त कार्यक्रममा नगरपालिकाभित्र सञ्चालित विभिन्न २८ वटा माध्यमिक तहका ५६ जना विद्यार्थीहरुले सहभागिता जनाएको कार्यक्रमका संयोजक सरोज हुमागाईले जानकारी दिए । बहस कार्यक्रमको प्रमुख निर्णायक बहसकर्मी सरोज खड्का रहेका थिए भने कार्यक्रमको सभापतित्व द रुलर लाईब्रेअरीका महासचिव मनिष ढकालले गरेका थिए ।

कार्यक्रममा शारदा मावि सुन्थानका सहभागी विजेता बनेका छन् भने भालेश्वर मावि, कुशादेवी मावि, शान्तिनिकेतन माविका सहभागीहरु उपविजेता भएका थिए ।