धुलिखेल, ४ माघ, धुलिखेल–रविओपी–नगरकोट सडकमा स्तरोन्नतिको काम सुरु भएको छ । सडकखण्डको कुईकेलमार्गगेटदेखि गोसाईथानसम्म स्तरोन्नति गर्न लागिएको हो । प्रदेश सरकारको आर्थिक सहयोगमा हुन लागेको योजना शनिबार सांसद बसुन्धरा हुमागाईले शिलान्यास गरे ।

ड्रेन र वाल बाहेक सडकको चौडाई ७ मिटरको हुनेछ । स्तरोउन्नती गरिने एक किलो मिटर मध्ये ९ सय मिटर लम्बाई सडक कालोपत्रे हुनेछ । २ करोड, ८३ लाख, ४९ हजार लागतमा पिच बाहेक ढलान, ढुंगाको गाह्रो, ग्यावीन गाह्रो र ड्रेन निर्माण हुनेछ ।

सडक स्तरोन्नतिको काम २०७७ साल जेठ मसान्तभित्र सकाईसक्नुपर्ने बनेपा नगरपालिका वडा नम्बर ६ का वडाध्यक्ष सचितानन्द केसीले जानकारी दिए ।

शिलान्यास कार्यक्रममा बोल्दै सांसद हुमागाईले पर्यटीय मार्गको रुपमा रहेको यो सडकलाई छिट्टै नगरकोटसम्म पिच गर्ने बताए । ‘यो सडक धुलिखेल, बनेपा र नगरकोट बीचको सिधा सम्पर्क राख्ने सडक हो, उनले भने ‘त्यसैले यसलाई स्तरोन्नति गरेर पर्यटकहरुको आवगमनलाई समेत सजिलो गराउन आवश्यक छ ।’