धुलिखेल, २८ पुसः काभ्रेको मण्डनदेउपुर नगरपालिकाका प्रमुख टोक बहादुर वाइबाले नगरपालिकाको नाममा नगरकोट समावेश गर्ने प्रस्ताव फेरी गरेका छन । सोमबारबाट सुरु भएको छैठौँ नगरसभामा नगरप्रमुख वाइबाले एक्लौटी नगरकोट नाम थप्ने प्रस्ताव गरेको एक सदस्यले बताए ।

यसअघि चौथो नगरसभामा पनि नगरप्रमुखले नगरकोट नाम थप्ने प्रस्ताव गर्दा वडा नम्बर ३ का वडासदस्य रुद्र बहादुर तामाङले प्रतिवाद गरेका थिए । तामाङको प्रतिवादपछि नगरप्रमुख वाइबाले उक्त प्रस्ताव थाति राखेका थिए । तर अहिले छैठौँ नगरसभामा पुनः प्रस्ताव लगेपछि आफ्नै पार्टीबाट निर्वाचित जनप्रतिनिधि समेत चकित परेका छन ।

नगरपालिकाको नाम फेर्ने जस्तो विषयमा पनि पार्टीभित्र कुनै छलफल नभएको गुनासो पार्टी नेता तथा कार्यकर्ताले गरेका छन । नगरप्रमुखले एक लौटी रुपमा नाम थप्ने प्रस्ताव लगेको उनीहरुको भनाई छ ।

नगरपालिकाको प्रशासनिक भवन समेत सारेकोमा स्थानीय असन्तुष्ट छन । वडा नम्बर ७ स्थित डेडी थुम्का पब्लिक क्याम्पसको भवन रहेको स्थान मनमति डाँडामा नगरपालिकाको नयाँ भवन बन्ने छ ।

सोमबारबाट सुरु भएको नगरसभामा विभिन्न प्रस्तावहरु छलफलका लागि प्रस्तुत गरिएकोे छ । यो पटक पनि नगरकोट नाम थप्न प्रस्ताव परेको छ । प्रस्तावमाथि माघ ३ र ४ गते दफाबार छलफल हुनेछ । प्रतिपक्ष दल नेपाली काँग्रेसका प्रतिनिधि नगरसभामा गएपनि उपस्थितिमा हस्ताक्षर गरेनन । उनीहरुले नगर शिक्षा ऐन संशोधन गर्न नहुने माग गरेका छन ।

९ सडक र नगरस्तरीय स्वास्थ्य चौकी निर्माण सम्बन्धी विशेष प्रस्ताव पनि दर्ता भएका छन । हिउँदे सभालाई पालिकाका लागि आवश्यक पर्ने विभिन्न ऐन, कानुन, नीति, कार्यविधि पारित गर्ने सभाको रुपमा पनि लिने गरिन्छ ।