धुलिखेल, १७ पुस : काभ्रेको पनौती नगरपालिकाले नयाँ सहकारी संस्था दर्ता गर्न तत्काललाई रोकेको छ । नगर स्तरीय सहकारी विकास समितिले नगरपालिकाभित्रका सहकारीलाई नियमन, ब्यवस्थापन र अनुगमन गर्नका लागि आवश्यक कानुन निर्माणका चरणमा रहेको भन्दै दर्ता रोकेको हो ।

समितिका सदस्य सचिव इन्द्रप्रसाद अधिकारीका अनुसार अन्यत्रै केन्द्रिय कार्यालय खोलेर पनौती नगरपालिकाभित्र सेवा केन्द्र विस्तार गर्न चाहाने सहकारीले पनि केहि समयका लागि पाउने छैनन् । सहकारी ऐन २०७४ जारी गरिसकेको नगरपालिकाले सहकारी सञ्चालनका लागि नीति समेत बनाइरहेको छ ।

नीति नबन्दा सम्मका लागि नयाँ सहकारी दर्ता र सेवा केन्द्र विस्तारको काम गर्न रोक लगाइएको सदस्य सचिव अधिकारीले जानकारी दिए । नगरपालिकाभित्र एकसयको हाराहारिमा विभिन्न विषयगत सहकारी संस्था सञ्चालनमा छन् ।