धुलिखेल ८ पुस: काभ्रेको पाँचखाल नगरपालिका र इट्टा उद्योगी बीच सहमति अझै हुन सकेको छैन । गएको शुक्रबार साझँसम्म बसेको बैठकले कुनै निष्कर्ष ननिकालेपछि मंगलबार पुनः बैठक बसिरहेको छ ।

तर बैठकले अहिलेसम्म कुनै निष्कर्ष निकाल्न सकेको छैन । बैठक अझै लम्बिन सक्ने प्रमूख प्रशासकीय अधिकृत लोक बहादुर भण्डारीले बताए । नगरपालिकाले इट्टा भट्टाका कारण प्रदूषण बढेको भन्दै विकल्प खोज्न उद्योगीहरुलाई आग्रह गरेको छ ।

उद्योगीहरुले भरपर्दो विकल्प नगरपालिकाले दिन नसकेको आरोप लगाइरहेका छन् । नगरपालिकाले विद्यूतीय मेसिनको प्रयोग गर्न उद्योगीहरुलाई भनेको छ । तर नवदुर्गा भवनी इट्टा इन्ड्रस्टिजका सञ्चालक जितेन्द्र खायमालीले मेसिन जडानपछि प्रदूषण कम हुन्छ भन्ने ढुक्क नहुदाँसम्म जडान गर्न नसकिने बताए ।

पाँचखाल नगरपालिकाभित्र ७ वटा इट्टा उद्योग सञ्चालमा छन । ती उद्योगले दाउरा र कोइला मार्फत इट्टा पोल्दै आइरहेका छन् ।