धुलिखेल, २६ मंसिर: काभ्रे जिल्लाभर यो वर्ष पनि ८५ वटा खानेपानीका नयाँ आयोजना सञ्चालनमा आएका छन । खानेपानी तथा सरसफाई डिभिजन मार्फत चालृु आर्थिक वर्ष २०७६÷७७ मा ८५ वटा नयाँ योजना थपिएको हो ।

प्रदेश सरकार, ससर्त अनुदान र खानेपानी गुणस्तर तर्फका योजना थपिएका हुन् । ५० लाख देखि २१ करोडसम्मको योजना थपिएको धुलिखेलस्थित खानेपानी तथा सरसफाई डिभिजन अन्तर्गतको स्टोर तथा सम्पर्क कार्यालयका इन्चार्ज ओमहरि ताम्राकारले जानकारी दिए ।

५० लाख लागतको खानेपानी आयोजना कुशादेवीमा सञ्चालन भइरहेको छ । यो योजना अन्तिम चरणमा पुगेको छ । त्यस्तै २१ करोडको ४ वटा खानेपानी आयोजना नमोबुद्ध नगरपालिकामा सञ्चालन भइरहेको छ । हरेक योजना तीन वर्षभित्र सकाउनुपर्ने हुन्छ ।

तर समयमै पैसा निकास नहुने, ठेक्कदारले राम्रो काम नगर्ने जस्ता समस्याका कारण जिल्लाका धेरै आयोजना लम्बिदै जाने गरेका छन् । त्यस्तै यसअघिका धेरै योजनाहरु मर्मत हुन सकेका छैनन् । कतिपय योजनाहरु अलपत्र छन् ।

अहिले खानेपानीका अधिकांश आयोजनाहरु स्थानीय तहले नै सञ्चालन गर्ने भएकाले कुन योजना अलपत्र छन् भन्ने कुराको यकिन तथ्याङक नरहेको स्टोर तथा सम्पर्क कार्यालय इन्चार्ज ताम्राकारले बताए ।