काभे २४ कात्तिक : काभ्रेको नमोबुद्ध नगरपालिका ८ दाप्चा तल्लो हटियाका श्रेष्ठ दम्पतीको हत्याको छानविन गर्न नेपाल प्रहरीको केन्द्रिय अनुसन्धान ब्यूरोको एक टोली घटनास्थल पुगेको छ ।

ब्यूरोका डिएसपी हरि बस्नेतको नेतृत्वमा ५ जनाको टोली घटनास्थल पुगेको छ । घटनास्थल पुगेको सिआइबीको मसिनो ढंगबाट घटनाको अनुसन्धान गर्ने छ । गएको मंगलबार धारिलो हतियार प्रहार गरी हत्या गरेको अवस्थामा ५५ बर्षी श्यामकृष्ण श्रेष्ठ र उनकी श्रीमती रुकुमाया श्रेष्ठको शव फेला परेपछि सिआइबीको टोली छानविनका लागि घटनास्थल पुगेको हो ।

घटनामा संलग्न भएको आरोपमा जिल्ला प्रहरी कार्यालय काभ्रेले अनुसन्धानका लागि २० जना पक्राउ गरेको थियो । पक्राउ परेका मध्ये अहिले ३ जनामात्रै प्रहरी हिरासतमा रहेको जिल्ला प्रहरी कार्यालय काभ्रेका प्रमूख जयराज सापकोटाले जानकारी दिए । ‘बाँकीलाई तारेखमा छाडिएको छ, उनले भने ‘जिल्ला प्रहरी कार्यालयले अनुसन्धान गरिरहेकै थियो, हामीलाई मद्दत गर्न केन्द्रबाट सिआइबीको टोली पनि आइपुगेको छ ।’

श्रेष्ठ दम्पत्तीको शवलाई धारिलो हतियार प्रहार गरी क्षतबिक्षत बनाइ सिरकले छोपेको अवस्थामा प्रहरीले फेला पारेको थियो ।