नमोवुद्ध काभ्रे, कार्तिक १९ । काभ्रेको नमोबुद्ध नगरपालिका ८ दाप्चा तल्लो हटियाका एक दम्पती गए राती आफ्नै घरमा मृत भेटिएका छन् । धारिलो हतियार प्रहार गरिएका ५५ बर्षका श्यामकृष्ण श्रेष्ठ र अन्दाजी ५० बर्षकी उनकी श्रीमती रुकुमाया श्रेष्ठको शव फेला परेको जिल्ला प्रहरी प्रमुख एसपी जयराज सापकोटाले जानाएका छन् ।

घटनास्थलमा धारिलो हतियार प्रहार गरी क्षतबिक्षत भएको अवस्थामा दम्पतीलाई प्रहरीले फेला पारेको थियो । हत्यापछि घटनास्थालमा पुगेकोे प्रहरी टोलीले मृतकको शवलाई सिरकले छोपेको अवस्थामा फेला परेको थियो । प्रहरी चौकी श्यामपाटीका इन्चार्ज केशव दर्जीको टोली अहिले घटना भएको स्थानमा खटिएको छ ।

मदिरा सेवनपछि घटना भएको प्रहरी अनुमान छ । प्रहरीका अनुसार घटनास्थलमा बियरका बोतल, गाजा र सुर्तीको धुलो छरिएको अवस्थामा भेटिएका छन् । दम्पतीले आफ्नै घरमा चियापसल संचालन गर्दै आएका थिए । छिमेकीका अनुसार राती पौने आठ बजेसम्म पसल खुल्ला रहेको थियो । मदिरा सेवन गर्न राती अवेर आएकाहरुबीच विवाद भएपछि हत्या भएको हुनसक्ने आशंका गरिएको छ। घटनाका सम्बन्धमा थप अनुसन्धान भइरहेको प्रहरीले जनाएको छ ।