काठमाण्डौ, २३ भदौ : काठमाडोंको भृकुटीमण्डपमा रहेको नेपाल पुलिस क्लबमा आज निकै तामझामका साथ उप्रधान तथा रक्षा मन्त्री ईश्वर पोखरेलले आज विद्युत बसको उद्घाटन गरेका छन् । काठमाण्डौका सडकमा धुलो, धुवाँरहित र वातावरणमैत्री विद्युतीय बसले प्रदुषणबाट उकुमुकस भएको काठमाडौंलाई केही राहत पुग्ने विश्वास गरिएको छ ।

सार्वजनिक यातायातमा यात्रा गर्दा भोगिने सकसलाई कम गर्न दावी सहित निजी क्षेत्रको सुन्दर यातायातले सार्वजनिक विद्युतीय बस सञ्चालनमा ल्याएको बिजुली बसलाई आज पोखरेलले उट्घाटन गरेका हुन् । बसको उद्घाटन गर्दै मन्त्री पोखरेलले आउँदा दिनमा विद्युतीय बसको संख्या बढाउने प्रतिबद्धता समेत व्यक्त गरेका छन् ।

मंगलबारदेखि नै चार ओटै बस सञ्चालनमा ल्याउने भनिए पनि दुई ओटा बसमात्रै सञ्चालनमा ल्याइएको छ । सञ्चालनमा आएका बस पनि प्राविधिक जाँचका लागि सडक विभाग लगिनेछ । कम्पनीले दुई ओटा बस पनि अबको केही दिनभित्रै नै सञ्चालनमा ल्याउने जनाएको छ ।

नेपालको सडक सुहाउँदो किसिमले डिजाइन गरिएको बसले रिंगरोडको रुट पाएको छ । सुन्दर यातायातले थप ११ ओटा बस भित्राउन चिनियाँ कम्पनीसँग सम्झौता गरिसकेको छ भने यही वर्षभित्र नै २५ ओटा विद्युतीय बस सञ्चालनमा ल्याउने जनाएको छ । महँगो मूल्य तिरेर ल्याइएको एउटा बसको मूल्य नै १ करोड ६२ लाख रहेको कम्पनीले जनाएको छ ।