धुलिखेल, ६ भदौ । काभ्रेको रोशी गाउँपालिका वडा नं. १२ को सबै र ११ का केही बस्तीहरुमा अनेकन चुनौतीका बीच केन्द्रीय विद्युत प्रशारण लाईन विस्तार कार्य अन्तिम चरणमा पुगेको छ । रोशी गाउँपालिकाको वडा नं. १२ र ११ का समुदायको विद्युतमा पहुँच विस्तार भएसँगै यी दुई वडा उज्यालो बन्ने भएका छन् ।

नयाँ किरण विद्युत सहकारी संस्थामार्फत विद्युत सेवा विस्तार गरिएको उक्त क्षेत्रमा विद्युत प्राधिकरण काभ्रे वितरण केन्द्र बनेपाले आगामी ११ गते बुधबार परीक्षण प्रशारण गर्ने तयारी गरेको छ । नेपाल विद्युत प्राधिकरणको सामुदायिक ग्रामीण विद्युतीकरण विभाग अन्तर्गत सेवा विस्तार गरिएको काभ्रे जिल्ला साविक भिमखोरी गाउँ विकास समितिको पहिलो चरणमा सम्पन्न भएको क्षेत्रमा विद्युत सेवा वितरण गर्न लागिएको हो । त्यसका लागि तेमाल सामुदायिक ग्रामीण विद्युतीकरण सहकारी संस्था लि.को सेवा क्षेत्रभित्र पर्ने टेकानपुरमा ट्यापिङको अन्तिम तयारी भएको छ ।

आज शुक्रबार उक्त संस्थाको तेमाल गाउँपालिका वडा नं. १ मा रहेको आधाबाटमा टिओडी मिटर जडान कार्य सम्पन्न भइसकेको नयाँ किरण विद्युत सहकारी संस्थाका अध्यक्ष चन्द्रमाया तामाङले बताएकी छिन् । उनकाअनुसार संस्थाको सेवा क्षेत्रको बाँकी रहेको भू–भागको विद्युतीकरणका लागि लगत्तै काम शुरु हुनेछ ।

नयाँ किरण विद्युत सहकारी संस्थाले विद्युत सेवा विस्तार गर्नका लागि सम्बन्धित उपभोक्तालाई हुनसक्ने सम्भावित दुर्घटनालाई मध्यनजर गरी सार्वजनिक सूचना जारी गरेको छ । विद्युत तार भए आसपासका विरुवाहरु कटान गर्न बाँकी भए रुख विरुवा काटेर सघाइदिनु हुन पनि अपील गरेको छ ।