काठमाडौं, ४ भदौ : काठमाडौंको नयाँ बसपार्कमा रहेको मोरङ पर्वत गेस्ट हाउसको कोठा नं. १११ मा एक जोडी मृत अवस्था फेला परेका छन् । चितवन चैनपुरका ३७ वर्षीय यमबहादुर मगर र काभ्रे पनौतीकी २८ वर्षीय सविता भनिने सबिना तामाङ बजगाई मृत भेटिएका हुन् ।

घटनाका सम्बन्धमा महानगरीय प्रहरी वृत्त, महाराजगञ्जले अनुसन्धान अगाडि बढाएको छ । प्रहरी वृत्तका डीएसपी फणिन्द्र प्रसाईंले घटनास्थलको प्रारम्भिक मुचुल्का उठाएर अनुसन्धान थालिएको बताएका छन् । कट्टु मात्र लगाएको अवस्थामा युवतीको शव खाटको तलपट्टी र युवकको खाटमाथि भेटिएको डीएसपी प्रसाईले बताए । हामीले छानवीन अगाडिठ बढाएका छौं, उनले भने ।

मृतक जोडी राति ११ बजे होटलमा बसेको प्रहरीले बताएको छ । होटलले विहान खान खान बोलाउँदा उनीहरुले ढोका खोलेका थिएनन् । दिउँसो १ बजेसम्म पनि ननिस्किएपछि प्रहरीलाई खबर गरी होटलको ढोका खोल्दा नग्न अवस्थामा जोडीलाई मृत भेटिएको थियो ।

मृतक जोडी बसेको कोठामा भेटिएका मदिराका बोतलहरुलाई प्रहरीले बरामद गरेको छ । घटनास्थल वरिपरि विष वा अन्य कुनै पनि प्रकृतिका औषधि नभेटिएका दुवैको मृत्यु कसरी भयो भन्ने खुल्न नसकेको अनुसन्धान अधिकृतले बताएका छन् । महिलाका श्रीमान् वैदेशिक रोजगारीका लागि खाडी मुलुकमा भएको बताइएको छ । पुरुष र महिला दुवै विवाहित हुन् । घटनास्थलमा फरेन्सिक विज्ञको टोली खटाइएको छ ।