काठमाण्डौ, ८ बैशाख: जब जब केन्द्रमा पार्टीका दुई अध्यक्ष बैठक बसेको खबर बाहिरिन्छ तब जिल्लामा तरंग छाउने गरेको छ ।

यस पटकपनि काभ्रे नेकपा भित्र ठूलो हलचल मच्चिएको छ । पार्टीको भावी जिल्ला नेतृत्वको रुपमा चर्चा पाएका ब्यक्तिहरु रिङ आउट भएको पोष्टहरु सामाजिक सञ्जालमा नेकपाकै कार्यकर्ताले लेख्न थालेका छन् ।

यसअघि पूर्व माओवादीबाट सूर्यमान दोङ लालध्वज अध्यक्ष र पूर्व एमालेबाट नारायण पाण्डे सचिवका रुपमा सिफारिस भएका थिए । तर दुबैको नाम हटेको नेकपाका कार्यकर्ताहरुको सामाजिक सञ्जालमा देख्न पाइन्छ ।

उनीहरुले अपुष्ट खबर भन्दै पूर्व माओवादीबाट रुकु चौलागाई अध्यक्ष र पूर्व एमालेबाट टोक बहादुर वाईबा सचिवमा सिफारिस भएको बताएका छन् ।

केन्द्रमा सचिवालयको बैठक सकिएको छ । बैठकले ७७ वटै जिल्लाका अध्यक्ष र सचिवको नाम टुंगो लगाएको बताइएको छ ।

पार्टीका प्रवक्ता नारायणकाजी श्रेष्ठले ७७ वटै जिल्लाका पार्टी अध्यक्ष र सचिवको नाम टुंगो लागेको बताए । तर नाम भने भोली मात्रै सार्वजनिक गरिनेछ ।