काठमाडौं, बैशाख ८ : तराई–मधेसका महिलाहरु सुखसयलका साथ बाँकी जीवन विताउने सपना सँगालेर आफ्ना पतिको घर अर्थात ‘ससुराल’ जान्छन् । तर कतिपय महिलाका लागि त्यही ससुराल ‘दहेज’ कै कारण ‘काल’ बनेको छ ।

यस्तैखाले दुखद घटनाको पछिल्लो उदाहरण बनेकी छन्, वीरगन्ज महानगरपालिका–२३ प्रसौनी विर्ताकी २८ बर्षीया अन्जुदेवी तात्वाँ । शुक्रबार दिउँसो सिर्सिया नदीमा अन्जुदेवीको शव जलाउन लागेको बेला प्रहरीले नियन्त्रणमा लियो ।

सो घटनासँगै तराई–मधेसका महिलाका लागि ‘ससुराल’ कति सुरक्षित छ या छैन भन्ने प्रश्न उठेको छ । प्रहरीका अनुसार अन्जुदेवीको शव जलाउन उनका पति पन्नालाल दास र उनका आफन्तले अन्तिम तयारी गरिरहेका थिए । ‘कुटपिट गरी एकजना महिलाको हत्या गरिएको र शव अन्त्येष्टीका लागि लगिएको खबर आएपछि प्रहरी टोली त्यहाँ तत्कालै पठाइयो’, पर्साका प्रहरी उपरीक्षक रेवती ढकालले भने, मृत्यु शंकास्पद देखिन्छ, किनभने प्रहरी देख्नासाथ मृतकका पति पन्नालालसहित सबै मलामी भागे ।’

पन्नालाल र आफन्तले सुरुमा अन्जुदेवीको शव भारतमा लगेर दाहसंस्कार गर्न खोजे पनि एम्बुलेन्सले नमानेपछि सिर्सिया नदीको घाटमा पुर्‍याइएको थियो । नियन्त्रणमा लिएको शव नारायणी अस्पतालमा पठाइएको र पोष्टमार्टमको रिपोर्ट आएपछि मात्रै मृत्युको कारण यकिन हुने ढकालले बताए । -नागरिक दैनिकबाट