काठमाडौँ, चैत २४ : देशभर आइतबारको मौसम पनि आंशिकदेखि सामान्य बदली रहने जल तथा मौसम पूर्वानुमान महाशाखाले जनाएको छ । मौसमविद शान्ति कँडेलले देशको पूर्वी तथा मध्य भूभागका केही स्थानमा र पश्चिमी भूभागका थोरै स्थानहरुमा हावाहुरी र मेघ गर्जनसहित वर्षाको सम्भावना रहेको जानकारी दिइन् । तर ठूलो हुरीबतासको सम्भावना भने नरहेको उनले बताइन् ।

मौसमविद कँडेलले मेघ गर्जनसहित वर्षा हुँदा हावाहुरी चल्ने र चट्याङ पर्ने सम्भावना अधिक रहने हुँदा सावधानी अपनाउनु पर्ने बताइन् । मेघ गर्जनसहित वर्षा भइरहँदा चट्याङबाट जोगिन फलामका सामग्री तथा बिजुलीको पोल नजिक बस्न नहुने मौसमविद बताउँछन् । मौसममा विकसित पछिल्लो प्रणालीका कारण अझै केही दिन मौसम सफा नरहने विभागगले जनाएको छ । मौसमविद कँडेलले अझै दुई–तीन दिन मौसममा बदली कायमै रहने जानकारी दिइन् ।