धुलिखेल, २२ चैत: काभ्रेपलाञ्चोक जिल्लाको चौरीदेउराली गाउँपालिका वडा नम्बर ६ का वडाध्यक्षले १५ दिनमा पुरा गर्छु भनेको काम १३ दिनमै पूरा गरिदिएका छन् ।

रेडियो नमोबुद्धले यहि चैत ९ गते आयोजना गरेको जनतासँग जनप्रतिनिधि कार्यक्रममा बाचा गरेको कुरा वडाध्यक्ष रेशम प्रसाद चौलागाई पूरा गरेका हुन् ।

कार्यक्रममा स्थानीय खड्का बहादुर पन्तले कृषकहरुलाई दूध बोक्ने क्यानको ब्यवस्था गरिदिने वडा कार्यालयसँग के योजना छ ? भनि प्रश्न सोधेका थिए ।

जवाफमा वडाध्यक्ष चौलागाईले क्यानको ब्यवस्था गर्न १५ दिनको समय मागेका थिए । वडा कार्यालयले ६८ जना कृषकलाई ५ लिटर दूध अट्न क्यान वितरण गरे हो ।

क्यानको उचित ब्यवस्था नहुदाँ कृषकलाई आफ्नै वडामा सञ्चालन भइरहेको दुग्ध विकास संस्थानको डेरीसम्म दूध पुर्याउन अप्ठ्यारो भएको थियो । वडा कार्यालयले क्यान विरतण गरेपछि आफुहरुलाई निकै सजिलो भएको कृषक रमेश ठकुरीले बताए ।

क्यान वितरण कार्यक्रममा बोल्दै वडाध्यक्ष चौलागाईले आफु पनि कृषक नै भएकाले कृषकहरुको हरेक समस्या समाधान गर्दै जाने बताए । उनले अब सहुलियत पूर्ण कृषि ऋणका लागि पहल गर्ने प्रतिबद्धता समेत जनाए । ‘हाम्रो ठाउँमा हुने भनेको कृषी र पशु नै हो, वडाध्यक्ष चौलागाईले भने ‘वडा कार्यालय कृषकहरुको हरेक समस्या समाधान गरेर अघि बढ्न तयार छ ।’

कृषकहरुले दूग्ध विकास संस्थानले तोकेको दर रेटले आफुहरुको लागत नउठ्ने भन्दै पहल गरिदिन वडाध्यक्ष चौगाईसँग अनुरोध पनि गरेका छन् । संस्थानले अहिले एक ल्याक्टो प्रति २ रुपैयाँ ६५ पैसा र एक प्याटमा ५ रुपैयाँ मूल्य दिदैँ आएको छ ।

तर पाँचखालमा भने ११ रुपैयाँ प्रति प्याट मूल्य रहेको छ । कात्तिकेदेउरीका कृषकहरुले पनि पाँचखालकै मूल्य पाउनु पर्ने माग राखेका छन् । संस्थानमा अहिले दैनिक ५ सय लिटर दूध संकलन हुदैँ आएको छ ।