सिञ्जा, २५ माघ : तीन महीनादेखि सदरमुकाम खलङ्गा अन्धकारमय बनेको छ । गत मङ्सिरदेखि सदरमुकाम खलङ्गासहित चन्दननाथ नगरपालिका अन्धकारमय छ । महीनौँदेखि बिजुली नहुँदा व्यापारीले करोडौँ रुपैयाँको व्यापार घाटा बेहोर्नुपरेको गुनासो गरेका छन् । बिजुली नहुँदा स्थानीयवासी टुकी र वैकल्पिक ऊर्जाको व्यवस्था गर्न बाध्य छन् ।

साना जलविद्युत् उपभोक्ता समिति खलङ्गाको लापर्वाहीका कारण उपभोक्ता बिजुलीबाट वञ्चित भएका हुन् । प्रमुख जिल्ला अधिकारी विष्णु पौडेलले चाँडै नै विद्युत् आपूर्ति गर्न लगाइने बताउनुभयो । बिजुली नहुँदा खलङ्गाका होटल व्यवसायी, व्यापारी, उद्योगीलगायत मारमा परेका अधिकारकर्मी लक्ष्मीकन्या बुढाले बताउनुभयो ।

एसइई र लोकसेवा तयारीका लागि सदरमुकाम झरेका सयौँ विद्यार्थीको पठनपाठन बिजुली नहुँदा प्रभावित भएको छ । “बिजुली नबालेरै पैसो तिर्न बाध्य छौँ”, उपभोक्ता सीता बुढाले भन्नुभयो ।
-रासस