सिन्धुपाल्चोक जिल्लाको लिसंखुका तामाङ समुदायले पनि विभिन्न कार्यक्रम गरी २८५५ औँ सोनाम ल्होछार मनाएका छन् ।

लिसंखु पाखर गाउँपालिकाको वडा नम्बर २ मा रहेको छ्योइफेल कुन्देलिङ गुम्बामा कार्यक्रम गरी ल्होछार मनाइएको हो । वडा कार्यालयको सक्रियतामा भएको कार्यक्रमममा लामा नाच, बोन्बो नाच, डम्फु नाच, ताम्बा नाच, पञ्चे बाजा नाच लगायतका झाँकी प्रस्तुत गरिएको थियो । त्यस्तै तामाङ समुदायको खानाका परिकार समेत राखिएको थियो ।

कार्यक्रममा लामा गुरुहरुले मोलम पाठ गरेका थिए । कार्यक्रममा बोल्दै वडाध्यक्ष हस्त बहादुर मोक्तानले ल्होछार गाउँ–गाउँ, टोल–टोल, घर–घरमा मान्नुपर्ने बताए । विभिन्न जात जातिले भरिएको समाजमा एकले अर्कोको संस्कार, संस्कृति, भाषा, धर्मलाई सम्मान गर्नुपर्ने भन्दै उनले वडा कार्यालयले दिने सेवा, सुविधामा विभेद नहुने बताए ।

वडाध्यक्ष मोक्तानले तामाङ घेदुङलाई सहर केन्द्रित ल्होछार कार्यक्रम नगर्न समेत आग्रह गरे । ‘ल्होछारलाई सहर केन्द्रित गरेर हुदैँन उनले भने ‘हामी हाम्रो सँस्कृतिलाई गाउँ गाउँमा पुर्याउन चाहाँन्छौँ, तामाङ घेदुङ पनि त्यहि बाटोमा अघि बढोस् ।’

कार्यक्रममा नृत्य प्रतियोगिता समेत गरिएको थियो । प्रतियोगितामा वडा नम्बर २ का साथै छिमेकी वडाबाट समेत सहभागि भएका थिए । वडा कार्यालयले प्रतियोगितामा प्रथम, द्धितिय र तृतीय भएकालाई नगर पुरस्कार प्रदान गरेको थियो ।

ल्होछार कार्यक्रमममा शिक्षक, विद्यार्थी, बृद्धाबृद्ध, लामा गुरु, विभिन्न राजनीतिक दलका प्रतिनिधि सहभागि भएका थिए ।

तस्बिरहरुः कृष्ण श्रेष्ठ र प्रेम कुमार ङ्याङजोको फेसबुकबाट