नुवाकोट, १८ माघ : ककनी गाउँपालिकाको काउलेमा आज भएको मिनिट्रक दुर्घटनामा एक बालकको मृत्यु भएको छ । चार जना घाइते भएका छन् । ककनी गाउँपालिका–१ महादेवस्थानबाट काउलेतर्फ जाँदै गरेको बा४ख ३७२८ नंको मिनिट्रक दुर्घटना हुँदा ककनीका ६ वर्षीय हेमन बलामीको मृत्यु भएको प्रहरी नायब उपरीक्षक भीमलाल भट्टराईले जानकारी दिनुभयो । गम्भीर घाइते उनलाई उपचारका लागि काठमाडौँ लैजाने क्रममा बाटोमा नै मृत्यु भएको हो ।

दुर्घटनामा सोही ठाउँका ११ वर्षीय अभिषेक बलामी, १० वर्षीय शक्ति बलामी, २७ वर्षीय अमर बलामी र २५ वर्षीया विनुदेवी बलामी घाइते भएका छन् । घाइतेको काठमाडौँस्थित ग्रीनसिटी अस्पतालमा उपचार भइरहेको छ । मिनिट्रक सडक भासिएर १०० मिटर तल खसेको हो । चालक शङ्कर बलामी फरार छन् ।
-रासस