विराटनगर, २१ मङ्सिर: राष्ट्रिय साङ्केतिक भाषा दोभाषे सङ्घ नेपालको आठौँ वार्षिक साधारणसभा तथा क्षमता अभिवृद्धि कार्यक्रमको उद्घाटन गरिएको छ । विराटनगर महानगरपालिका प्रमुख भीम पराजुलीले उद्घाटन गर्नुभएको सो दुई दिने कार्यक्रममा सातवटै प्रदेशका ३६ दोभाषे प्रशिक्षकको सहभागिता छ । साङ्केतिक भाषामा दुई हजार २०० शब्द बोलिँदै आएकामा हाल चार हजार ७०० शब्द बनेकाले तालीमको आवश्यकता परेको बताइएको छ ।

सो अवसरमा प्रमुख पराजुलीले भिन्न भाषा र व्यवहारका मानिसलाई मुलुक तथा समाजका विषयमा जानकारी गराउन तालिमले विशेष मद्दत गर्ने बताउनुभयो । सङ्घका अध्यक्ष सिलु शर्माको अध्यक्षतामा भएको सो कार्यक्रममा सङ्घका संस्थापक अध्यक्ष सानुखेम वाजा र सन्तोषी घिमिरेले पनि बोल्नुभएको थियो ।
-रासस