धुलिखेल १ मंसिर: काभ्रेको तेमाल गाउँपालिका भित्रका वडा कार्यालयहरुले उपभोक्ता समिति गठनलाई तिब्रता दिएका छन् ।
चालु आर्थिक वर्ष २०७५/७६ मा आफ्नो वडामा सञ्चालन हुने विभिन्न विकास योजनाका लागि वडा नम्बर ३ ले उपभोक्ता समिति गठन गरिसकेको वडाध्यक्ष विष्णु बहादुर तामाङले जानकारी दिए ।

‘हामीले उपभोक्ता समिति गठन गरिसकेका छौँ, वडाध्यक्ष तामाङले भने ‘अबको एकसाता भित्रै ती उपभोक्ता समितिले सम्बन्धित योजनाको काम अघि बढाउँछन् ।’

उनका अनुसार वडा कार्यालय सरमथीमा २५ योजना मध्ये २४ वटा योजनाको निर्माण कार्य पूरा गर्न उपभोक्ता समिति गठन गरिएको हो । यस वडालाई चालु आर्थिक वर्षका लागि गाउँ कार्यपालिकाले ३५ लाख रुपैयाँ बजेट विनियोजन गरेको थियो ।

यसैबीच तेमाल गाउँपालिकाको वडा नम्बर १ र २ ले पनि चालु आर्थिक वर्ष २०७५÷७६ मा सञ्चालन हुने सम्पूर्ण विकास योजनाका लागि उपभोक्ता समिति गठन गरिसकेका छन् । त्यस्तै अन्य वडाहरुमा पनि उपभोक्ता समिति गठनको प्रक्रिया धमाधम भइरहेको बताइएको छ ।