स्याङ्जा, २५ असोज भौतिक योजना तथा यातायातमन्त्री रघुवीर महासेठले अर्जुनचौपारी हुँदै पर्वत जाने सडक कालोपत्रे गरिने प्रतिबद्घता जनाउनुभएको छ ।

अर्जुनचौपारी गाउँपालिकास्थित दरौंँखोलामा मोटर जाने पुलको उद्घाटन गर्दै उहाँले विकासलाई तीव्रता दिइने बताउनुभयो । उहाँले अर्जुनचौपारीस्थित दरौँखोलामा रु पाँच करोड २२ लाख ९२ हजार ४०३ लागतमा निर्माण गरिएको पुलको उद्घाटन गर्नाका साथै अर्जुनचौपारी हुँदै पर्वत जोड्ने बाटाको समेत शिलान्यास गर्नुभएको छ ।

कार्यक्रममा भूमि व्यवस्था, सहकारी तथा गरीबी निवारण मन्त्री पद्माकुमारी अर्यालले सरकारले भारतीय पेन्सनरलाई पनि वृद्घभत्ता दिने बताउँदै सरकारले सबै प्रक्रिया पूरा गरेकालाई सामाजिक भत्ता उपलब्ध गराउने जानकारी दिनुभयो । उहाँका अनुसार अर्जुनचौपारी– आग्रीखर्क  पर्वत जोड्ने बाटाका लागि रु ११ करोडको बोलपत्र आह्वान गरिसकिएको छ ।

कार्यक्रममा प्रतिनिधिसभा सदस्य नारायण मरासिनी र प्रदेशसभा सदस्य मीनप्रसाद गुरुङलगायतले सम्बोधन गर्नुभएको थियो ।