खोटाङ, २७ भदौ : पिको लघु जलविद्युत् आयोजना सञ्चालनमा आएपछि सोल्मा लामिडाँडाका स्थानीयवासी खुसी भएका छन् । साकेला गाउँपालिका–३ खिदिमास्थित खोबुखोलामा सञ्चालित उक्त जलविद्युत् आयोजनाबाट सोल्मा लामिडाँडाका ७० घर झिलीमिली भएको छ । वैकल्पिक ऊर्जा प्रवद्र्धन केन्द्र खुमलटार ललितपुरको ५५ प्रतिशत, स्थानीयवासीको ४० र वडा कार्यालयको पाँच प्रतिशत लगानीमा सञ्चालनमा आएको उक्त आयोजनाबाट ९ दशमलव ५ किलोवाट विद्युत् उत्पादन हुने गरेको छ ।

सो जलविद्युत्बाट ल्याइएको पानीबाट सुधारिएको व्यावसायीक पानी घट्टासमेत सञ्चालन गरिएको छ । लघु जलविद्युत्मार्फत २४ औं घण्टा बत्ती बाल्न, मिल तथा कम्प्युटर सञ्चालनलगायत विद्युतीय कामका लागि सहज भएको निर्माण उपभोक्ता समितिका सचिव समराज राईले जानकारी दिनुभयो । वर्षौ अघिदेखि टुकी तथा सोलारमार्फत उज्यालो उपभोग गर्दै आएका स्थानीयवासी २४ औं घण्टा विद्युत उपभोग गर्न पाएपछि हर्षित भएका छन् । विद्युत् उत्पादन गृहसँगै जडान गरिएको सुधारिएको पानी घट्टामा प्रति मिनेट ८ केजी अन्न पिसानी गर्न सकिने निर्माण उपभोक्ता समितिले जनाएको छ ।

सुधारिएको पानी घट्टा सञ्चालनमा आएपछि छिमेकी वडाका स्थानीयवासीसमेत सेवा लिन आउने गरेको समितिका सचिव राईले जानकारी दिनुभयो । जिल्लाको दक्षिणी पूर्वी क्षेत्रमा पर्ने खिदिमास्थित सोल्मा लामिडाँडामा यसअघि ढिकीजाँतोमार्फत कुटानीपिसानी गर्दै आइएको थियो । वातावरणीय हिसाबले राम्रो मानिएको सुधारिएको पानी घट्टा सञ्चालनमा आएपछि वर्षौदेखि कष्टका साथ कुटानीपिसानी गर्दै आएका महिला सबैभन्दा बढी लाभान्वित भएका छन् । डिजेलबाट चल्ने मिलमा पिसानी गर्दा लाग्ने खर्चभन्दा आधा कम मूल्यमा सुधारिएको पानी घट्टामा पिसानी गर्न सकिने जनाइएको छ । करीब ९० मिटरमाथिबाट झारिएको पानीबाट सञ्चालन गरिएको सुधारिएको पानी घट्टा सञ्चालन भएपछि आर्थिक बचतसमेत भएको स्थानीयवासीले बताउनुभयो ।