बलात्कारीलाई फाँसीको माग गर्दै काठमाडौको माइतीघर मण्डलामा अर्धनग्न प्रदर्शन गरेका छन्। शनिबार महिला अधिकारकर्मीहरु कालो पेटीकोट लगाएर प्रदर्शनमा उत्रिएपछि प्रहरीले पक्राउ गरेको छ ।

बलात्कारीलाई फाँसी दे भन्दै नाराबाजी गर्न थालेपछि प्रहरीले उनीहरूलाई नियन्त्रणमा लिएको हो। प्रदर्शनबाट ५ महिला, एक पुरुष र एक जना तेस्रो लिङ्गीलाई समेत प्रहरीले सिंहदरबारस्थित वृत्तमा राखेको थियो । उनिहरुले बलात्कारीलाई फाँसीको व्यवस्था गर, भन्ने ब्यानर सहित माइतीघर मण्डलामा भेला भएका युवा युवतीले संविधान संशोधनको माग गरेका थिए । मुलुकमा बलात्कारका घटना बढ्दै जानु र दोषीलाई कडा कारबाही नहुनु लगायत घटनाबाट आक्रान्त बनेको युवा पुस्ता यस अभियानमा संलग्न छन्। शान्तिपूर्णरुपमा प्रदर्शनमा प्रहरीले हस्तक्षेप गरेका थिए ।

विशेष गरेर नयाँ पुस्ताका युवायुवतीहरूले सामाजिक सञ्जालमार्फत् नै बलात्कारीलाई फाँसी दिनुपर्ने अभियान चलाइरहेका छन् । भदौ १ गतेदेखि लागू भएको मुलुकी अपराध संहिता ऐनले सार्वजनिक स्थानमा अर्धनग्न प्रदर्शन गर्नेलाई पनि कानूनी कारबाही हुने व्यवस्था छ।