काठमाडौं । नेपाली कांग्रेस केन्द्रीय कार्यसमिति बैठकले मंसिरमा नियमित महाधिवेशन गर्ने निर्णयलाई प्राथमिकता दिँदै विशेष महाधिवेशनको माग अस्वीकार गरेको छ।

ललितपुरको सानेपास्थित पार्टी कार्यालयमा बिहीबार बसेको बैठकमा अधिकांश सदस्यहरूले नियमित प्रक्रियाबाटै नयाँ नेतृत्व चयन गर्नुपर्नेमा जोड दिए ।

१४औं महाधिवेशनका ५३ प्रतिशतभन्दा बढी प्रतिनिधिले विशेष महाधिवेशनको माग गरे पनि कार्यवाहक सभापति पूर्णबहादुर खड्काले नियमित महाधिवेशन समयमै सम्पन्न हुने विश्वास व्यक्त गरे। डा. शेखर कोइराला, गगनकुमार थापा, मोहनबहादुर बस्नेत र अन्य नेताहरूले पनि विशेष होइन, नियमित महाधिवेशनमार्फत पार्टीमा ऊर्जा र एकता ल्याउनुपर्ने धारणा राखे।

पार्टी प्रवक्ता डा. प्रकाशशरण महतका अनुसार बैठकको एजेन्डामा विशेष महाधिवेशन समावेश नै थिएन र कांग्रेसले मंसिरमै नियमित महाधिवेशन गर्ने दिशामा छलफल अघि बढाएको छ।