काठमाडौं । रुसले आइतबार युक्रेनमा क्षेप्यास्त्र भण्डारण स्थल र सैन्य संरचनाहरूमा हमला गरेको दाबी गरेको छ । रुसी रक्षा मन्त्रालयका अनुसार, निप्रोपेट्रोभस्क क्षेत्रमा रहेको एक बस्ती नियन्त्रणमा लिएको छ र ड्रोन उत्पादन तथा भण्डारण केन्द्र, अस्थायी तैनाती बिन्दुहरू लगायतका सैन्य ठेगानाहरूमा आक्रमण गरिएका छन् ।

मन्त्रालयको रिपोर्टअनुसार, पछिल्लो २४ घण्टाभित्र रुसी वायु रक्षा प्रणालीले युक्रेनी सेनाका तीन बहु–प्रक्षेपण रकेट प्रणाली (MLRS) र १७२ ड्रोनहरू खसालेको छ । यसैबीच, युक्रेनी सशस्त्र बलले पनि रुसी ऊर्जा पूर्वाधारहरूमा आक्रमण गरेको जनाएको छ। युक्रेनी जनरल स्टाफका अनुसार, आइतबार दिउँसोसम्म फ्रन्टलाइनमा ८५ वटा भिडन्त भएका छन्, जसमध्ये ३१ केवल पोकरोभस्क क्षेत्रमा देखिएको जनाइएको छ ।

आइतबार बिहान, युक्रेनी सेनाले आफ्नै रक्षा मन्त्रालय अन्तर्गतको मुख्य गुप्तचर निर्देशनालयसँग सहकार्य गर्दै समारा क्षेत्रको एक तेल रिफाइनरीमा समन्वित आक्रमण गरेको जनाएको छ। आक्रमणबाट भएको क्षतिको मूल्याङ्कन भइरहेको छ।

त्यसैगरी, उत्तरी-पश्चिमी रुसको लेनिनग्राद क्षेत्रस्थित उस्ट-लुगा बन्दरगाहमा पनि आइतबार बिहान ड्रोन आक्रमणपछि आगलागी भएको पुष्टि गरिएको छ । बन्दरगाहमाथि प्रहार गरिएका दसवटा ड्रोनहरू रूसी वायु रक्षा प्रणालीले नष्ट गरे पनि खसालिएका ड्रोनका भग्नावशेषले एउटा डकमा आगो लागाएको थियो। गभर्नरका अनुसार आगो निभाइसकिएको छ र प्रारम्भिक रिपोर्टले कुनै मानवीय क्षति नभएको संकेत गरेका छन् ।