काठमाडौँ २२ फागुन । नेकपा ओली पक्षले आफूले आह्वान गरेको संसदीय दलको बैठकमा १ सय १५ सांसद सहभागी भएको दाबी गरेको छ । बैठकमा प्रधानमन्त्री केपी ओलीले यो संख्या अझै बढेर जाने भन्दै उत्साहित हुन सांसदहरुलाई निर्देशन दिएका छन् ।

प्रधानमन्त्री ओलीले अविश्वासको प्रस्ताव ल्याएर सरकारलाई हटाउने हिम्मत कसैको नरहेको भन्दै सांसदहरुलाई उत्साहजनक रुपमा अगाडि बढ्न निर्देशन दिएको राष्ट्रिय सभाका प्रमुख सचेतक खिमलाल भट्टराईले जानकारी दिए । भट्टराईका अनुसार बैठकमा प्रतिनिधिसभाबाट ९१ र राष्ट्रिय सभाबाट २४ जना सांसद्हरु गरी १ सय १५ जनाको उपस्थित थिए ।

कानुनी रुपमा नेकपाको संसदीय दल विभाजित हुन कठिन रहेको भन्दै प्रमुख सचेतक भट्टराईले आफ्नो पक्षबाट बाहिर गएका सांसदहरु पनि फर्किने विश्वास व्यक्त गरे ।

बैठकले आइतबारदेखि सुरु हुने संसद् अधिवेशन मर्यादित र व्यवस्थित बनाउने निर्णय पनि गरेको छ ।

शुक्रबार नेकपा दाहाल नेपाल पक्षले पनि संसदीय दलको बैठकमा आफ्नो पक्षमा बहुमत रहको दाबी गरेको थियो । संसदीय दलको नेताबाट केपी ओलीलाई हटाएर अर्का अध्यक्ष पुष्पकमल दाहाललाई संसदीय दलको नेतामा चयन गरेको थियो ।