काठमाडौँ, १५ फागुन । नेपाल कम्युनिस्ट पार्टी (नेकपा) ओली समूहले आफूहरुसँग एक सयभन्दा बढी सांसदहरु रहेको दाबी गरेको छ । नेकपा दाहाल नेपाल समूहले आफूहरुसँग ९३ सांसद रहेको दाबी गरिरहेका बेला शुक्रबार मात्र ओली पक्षको संसदीय दलको प्रमुख सचेतकको जिम्मेवारी पाएका विशाल भट्टराईले उक्त दाबी गरेका हुन् ।

शनिवार राजधानीमा आयोजित एक साक्षात्कार कार्यक्रममा संसदीय दलका मुख्य सचेतक विशाल भट्टराईले प्रधानमन्त्री ओलीको पक्षमा बहुमत सांसदहरु रहेको जिकिर गर्दै संसदमा आवश्यक परे त्यो देखाउन आफूहरु तयारी अवस्थामा रहेको बताएका हुन् । उनले भने–‘प्रधानमन्त्री ओली अल्पमतमा हुनुहुन्छ भनेर बाहिर हल्ला चलाइएको छ, तर म दाबाका साथ भन्छु–उहाँ बहुमतमा हुनुहुन्छ । आवश्यक पर्दा त्यो हामी देखाउन तयार छौं । उहाँको पक्षमा संख्याको कुरा गर्नुहुन्छ भने पनि एक सयभन्दा बढी सांसद छन् ।’

प्रमुख सचेतक भट्टराईले प्रधानमन्त्री ओलीविरुद्ध संसदमा अविश्वासको प्रस्ताव दर्ता भए आफूहरुले डटेर सामना गर्ने पनि बताए । तर पार्टीका सांसदहरुले पार्टीको ह्विप उल्लंघन गरे विधानअनुसार कारबाही गरिने चेतावनीसमेत उनले दिए ।