धुलिखेल, ६ साउनः मण्डनदेउपुर नगरपालिकाको वडा नम्बर ७ कालिदेवी प्राथमिक विद्यालयको क्वारेन्टाइन ब्यवस्थापनमा खटिएकालाई कोरोना भाइरसको आंशकामा धुलिखेल अस्पताल ल्याइएको छ । वडा नम्बर ७ घर भएका ती पुरुषको स्वाब परीक्षणमा शंका लागेपछि आज धुलिखेल पठाइएको मण्डनदेउपुर नगरपालिकाका क्वारेन्टाइन ब्यवस्थापक दिपक कुमार घिमिरेले जानकारी दिनुभयो ।

क्वारेन्टाइन ब्यवस्थापक घिमिरेका अनुसार रिपोर्टमा शंका भएपछि थप परीक्षण गर्न धुलिखेल अस्पताल ल्याइएको हो । संक्रमण आंशका गरिएका ती पुरुषको घर सिल गरिएको छ । उनीसँग सम्पर्कमा आएकाहरुको खोजी भइरहेको घिमिरेले बताउनुभयाे ।

संक्रमण आंशका गरिएका ती पुरुषसँगै काम गर्ने अन्य सबै जनाको परीक्षणमा कोरोना देखिएको थिएन् । उनी क्वारेन्टाइन भित्रै बस्ने ब्यक्ति भएकाले समुदायसम्म कोरोना फैलियो की भन्ने चिन्ता नलिन घिमिरेले आग्रह गर्नुभयो ।