धुलिखेल, २० चैतः बनेपा प्रहरीले बिहीबार लकडाउन उलंघन गर्दै हिड्ने करिब एक सय जनालाई नियन्त्रणमा लिएको छ । इलाका प्रहरी कार्यालय बनेपाले लकडाउनको दशैँ दिन अनावश्यक रुपमा हिड्डुल गर्नेलाई नियन्त्रणमा लिएको हो । काभ्रे प्रहरीले जिल्ला भरका आफ्नो युनिटलाई लकडाउनको उल्लंघन गर्ने जो कोहिलाई पनि नियन्त्रणमा लिन निर्देशन दिएको छ ।

नियन्त्रणमा लिएकालाई बनेपा बसपार्कमा राखिएको छ । उनीहरुलाइ लकडाउनका बेला गर्न हुने र नहुने कुरा जानकारी गराइने छ । त्यस्तै कोरोना भाइरसबाट जोगिने उपाय पनि सिकाइने प्रहरीले जनाएको छ । त्यस्तै उनीहरूकाे ज्वराेकाे समेत जाँच गरिएकाे छ ।

यसअघि मंगलबार जिल्लाभर १ सय ४९ जनालाई नियन्त्रणमा लिएको थियो । उक्त दिन प्रहरीले बनेपाबाट मात्रै १ सय २२ जना नियन्त्रणमा लिएको थियो । नियन्त्रणमा लिएको सबैलाई पोलिटेक्निकलको खेलमैदानमा लगेर लकडाउनका बेला ख्याल गर्नुपर्ने कुरा र कोरोना भाइरसबाट जोगिने उपायका बारे ३ घण्टामा सम्म राखेर अब देखि अनावश्यक रुपमा बाहिर हिड्डुल नगर्ने लिखित प्रतिबद्धता जनाएर छोडेको थियो ।