धुलिखेल, २५ पुसः नेकपा प्रदेश ३ को संसदीय दलले प्रदेशको राजधानी हेटौंडा र नाम वाग्मती राख्ने निर्णय गरेको छ ।

मुख्यमन्त्री डोरमणि पौडेलको निवासमा शुक्रबार बसेको संसदीय दलको बैठकले पार्टी सचिवालयको निर्देशनअनुसार निर्णय गरेको हो । नेकपाको सचिवालयले राजधानी हेटौंडा र नाम वाग्मती राख्न निर्देशन दिएको थियो । तर सचिवालयको निर्देशनप्रति असन्तुष्ट सांसदहरुले आफ्नो फरक मत दर्ज गरेका छन् ।

धेरै सांसद काभ्रेको पक्षमा रहेकाले संसदीय दलको बैठकमा सहमति जुट्न सकेको थिएन । अब प्रदेशको नाम र राजधानीका विषयमा नेकपाले प्रदेशसभामा एउटा मात्र प्रस्ताव दर्ता गराउनेछ । नेकपा संसदीय दलका नेतासमेत रहेनुभएका प्रदेश ३ का मुख्यमन्त्री डोरमणि पौडेलले फलोर क्रस गर्ने र अर्को प्रस्ताव दर्ता हुने सम्भावना बताए । प्रदेशसभामा नेकपा एक्लैको बहुमत छ ।

मूख्यमन्त्री पौडेलले नेकपाभित्र ह्वीप लाउनुपर्ने अवस्था सिर्जना नहुने दाबी समेत गर्नुभयो । नेकपाभित्र प्रदेशको नाम भन्दा राजधानीको विषयमा विवाद छ ।