काठमाडौं । लामो समयदेखि लाइसेन्स छपाइमा देखिएको ढिलासुस्ती अन्त्य गर्न सरकारले नयाँ प्रणाली लागू गर्दै केन्द्रबाटै लाइसेन्स छपाइको बाटो खुला गरेको छ।

विद्युतीय ड्राइभिङ लाइसेन्स तथा सवारी दर्ता प्रणाली (ईडीएलभिआरएस)मार्फत सेवाग्राहीको विवरण सिधै सुरक्षण मुद्रण केन्द्रमा पुग्नेछ। छपाइपछि हुलाकमार्फत सम्बन्धित यातायात कार्यालयमा लाइसेन्स पठाइनेछ। पहिलो चरणमा मधेश प्रदेशका ३ हजार ८१ लाइसेन्स छपाइ गरी पठाइसकिएको विभागले जनाएको छ।

प्रदेश सरकारले सुरक्षण मुद्रण केन्द्रसँग सम्झौता गरेर आफैं छाप्न सक्ने भए पनि सम्झौता नगरेको अवस्थामा सेवाग्राहीलाई लाइसेन्सका लागि लामो समय कुर्न नपरोस् भनेर केन्द्रबाटै छपाइ गरिनेछ। लुम्बिनी प्रदेशले समेत छपाइका लागि सम्झौता प्रक्रिया अघि बढाएको विभागले जनाएको छ।