काठमाडौं । राष्ट्रिय वाणिज्य बैंक लिमिटेडले गत आर्थिक वर्ष २०८२/८३ मा खुद नाफा र ब्याज आम्दानी दुवैमा उल्लेख्य वृद्धि गरेको छ। बैंकले एक वर्षमा ४ अर्ब ५५ करोड रुपैयाँभन्दा बढी खुद नाफा कमाएको हो।

बिहीबार सार्वजनिक गरिएको गत आर्थिक वर्षको चौथो त्रैमाससम्मको अपरिष्कृत वित्तीय विवरणअनुसार बैंकको खुद नाफा अघिल्लो आर्थिक वर्षको तुलनामा ६०.६८ प्रतिशतले बढेर ४ अर्ब ५५ करोड ६८ लाख रुपैयाँ पुगेको छ। अघिल्लो आर्थिक वर्षको असार मसान्तसम्म बैंकको खुद नाफा २ अर्ब ८३ करोड ६० लाख रुपैयाँ थियो। नाफासँगै बैंकको खुद ब्याज आम्दानी १७.८५ प्रतिशतले बढेर ११ अर्ब ९६ करोड ६१ लाख ५३ हजार रुपैयाँ पुगेको छ। त्यस्तै, खुद फि तथा कमिसन आम्दानी ८.३४ प्रतिशतले बढेर १ अर्ब ६३ करोड ४२ लाख रुपैयाँ पुगेको छ।

बैंकको कुल सञ्चालन आम्दानी पनि १४.१९ प्रतिशतले बढेर १५ अर्ब ५ करोड ६६ लाख रुपैयाँ पुगेको छ। सञ्चालन मुनाफा भने ६४.२६ प्रतिशतले बढेर ६ अर्ब ४७ करोड ५३ लाख रुपैयाँ पुगेको छ। बैंकको नाफा वृद्धिमा इम्पेरमेन्ट चार्जमा आएको उल्लेख्य कमी मुख्य कारण देखिएको छ। अघिल्लो आर्थिक वर्षमा २ अर्ब २३ करोड ४४ लाख रुपैयाँ रहेको इम्पेरमेन्ट चार्ज समीक्षा अवधिमा घटेर ८४ करोड ७९ लाख रुपैयाँमा सीमित भएको छ। यसले सञ्चालन मुनाफा र खुद नाफा दुवैमा सकारात्मक प्रभाव पारेको हो।

प्रतिसेयर आम्दानीमा आकर्षक सुधार

बैंकको प्रतिसेयर आम्दानी (ईपीएस) मा पनि उल्लेख्य सुधार आएको छ। अघिल्लो आर्थिक वर्षमा १८ रुपैयाँ १४ पैसा रहेको प्रतिसेयर आम्दानी बढेर गत आर्थिक वर्षमा २९ रुपैयाँ १४ पैसा पुगेको छ। अर्थात् बैंकको प्रतिसेयर आम्दानी एक वर्षमा ११ रुपैयाँले बढेको छ। बैंकको वितरणयोग्य नाफा १ अर्ब ७ करोड ६९ लाख ५७ हजार रुपैयाँ रहेको छ भने वितरणयोग्य प्रतिसेयर आम्दानी ६ रुपैयाँ ८९ पैसा रहेको छ।

खराब कर्जा सामान्य बढ्यो, आधार दर घट्यो

नाफा र आम्दानीमा सुधार आए पनि बैंकको खराब कर्जा भने केही बढेको छ। अघिल्लो आर्थिक वर्षमा ३.७९ प्रतिशत रहेको खराब कर्जा बढेर ३.९५ प्रतिशत पुगेको छ। बैंकको कर्जा–निक्षेप अनुपात ५०.८७ प्रतिशत कायम रहेको छ। यसैगरी, बैंकको आधार दर ४.८९ प्रतिशतबाट घटेर ४.२२ प्रतिशत मा झरेको छ। समीक्षा अवधिमा बैंकको चुक्ता पुँजी १५ अर्ब ६३ करोड ७३ लाख ७७ हजार रुपैयाँ रहेको छ। जगेडा कोष भने १०.७० प्रतिशतले बढेर ४० अर्ब ४५ करोड ४ लाख ७९ हजार रुपैयाँ पुगेको छ।

निक्षेप र कर्जा दुवै बढे

राष्ट्रिय वाणिज्य बैंकले गत आर्थिक वर्षको अन्त्यसम्म ६ खर्ब ८६ अर्ब १३ करोड ५६ लाख रुपैयाँ निक्षेप संकलन गरेको छ। त्यस्तै, बैंकले कर्जा लगानी पनि १३.६० प्रतिशतले विस्तार गर्दै ३ खर्ब ३२ अर्ब ८ करोड ३४ लाख ५० हजार रुपैयाँ पुर्‍याएको छ। समग्रमा, नाफा, ब्याज आम्दानी, सञ्चालन मुनाफा र प्रतिसेयर आम्दानीमा आएको सुधारले राष्ट्रिय वाणिज्य बैंकको गत आर्थिक वर्षको वित्तीय प्रदर्शनलाई बलियो बनाएको देखिन्छ। यद्यपि, खराब कर्जा बढ्नु भने बैंकका लागि चुनौतीका रूपमा देखिएको छ।