काठमाडौं । सामाजिक सञ्जाल फेसबुकको वेब (ब्राउजर) संस्करणमा आइतबार अचानक प्राविधिक समस्या देखिएको छ। समस्यापछि विश्वका विभिन्न स्थानका प्रयोगकर्ताले आफ्नो फेसबुक खाता खोल्न र प्रयोग गर्न कठिनाइ भोगेका छन्।

फेसबुकको वेबसाइट खोल्ने प्रयास गर्दा “Account temporarily unavailable” भन्ने सन्देश देखिएको छ। कम्पनीले साइटमा आएको प्राविधिक समस्याका कारण केही समयका लागि खाता उपलब्ध नभएको जनाउँदै केही मिनेटपछि पुनः प्रयास गर्न प्रयोगकर्तालाई आग्रह गरेको छ।

यता, सेवा अवरोध ट्र्याक गर्ने डाउनडिटेक्टर मा पनि आइतबार दिउँसो करिब १:३० बजेदेखि फेसबुकसम्बन्धी गुनासोहरू एक्कासि बढेको देखिएको छ। धेरै प्रयोगकर्ताले वेब संस्करणमा लगइन गर्न नसकेको, पृष्ठ लोड नभएको तथा विभिन्न फिचरले काम नगरेको जानकारी दिएका छन्।

हालसम्म कम्पनीले समस्याको विस्तृत कारण सार्वजनिक गरेको छैन। प्राविधिक टोलीले समस्या समाधानका लागि काम गरिरहेको जनाइएको छ।

मोबाइल एपमा अधिकांश प्रयोगकर्ताले सामान्य रूपमा सेवा प्रयोग गर्न सके पनि ब्राउजर संस्करणमा भने अवरोध देखिएको बताइएको छ।