सुर्खेत । वीरेन्द्रनगरमा स्रोत नखुलेको ठूलो परिमाणको सुन–चाँदीसहित एक व्यापारी पक्राउ परेका छन्।

जिल्ला प्रहरी कार्यालय सुर्खेतले राजाचोक नजिक सञ्चालनमा रहेको ‘शिव इम्पोरियम’मा छापा मार्दै सञ्चालक श्यामसुन्दर अग्रवाललाई नियन्त्रणमा लिएको हो। प्रहरीका अनुसार पसलबाट करिब तीन करोड रुपैयाँ बराबरका सुनचाँदीका गरगहना बरामद गरिएको छ। विभिन्न बट्टा, पोका र डिब्बामा राखिएका १८५ थान गरगहना फेला परेपछि प्रहरी पनि छक्क परेको जनाएको छ। त्यसैगरी, दुई लाख १९ हजार ५०० रुपैयाँ नेपाली नगद र आठ लाख ११ हजार ९०० रुपैयाँ भारतीय रुपैयाँ समेत बरामद गरिएको छ।

विशेष सूचनाका आधारमा गरिएको कारबाहीमा स्रोत नखुलेको सुन र ठूलो परिमाणको नगद भेटिएपछि प्रारम्भिक अनुसन्धानमै आर्थिक अनियमितता र अवैध कारोबारको आशंका गरिएको छ।

बरामद सामग्री गन्नकै लागि प्रयोग हुँदै आएको नोट गन्ने मेसिन (क्यास काउन्टर) समेत प्रहरीले नियन्त्रणमा लिएको छ, जसले कारोबारको आकार झन् शंकास्पद देखाएको प्रहरी स्रोतको भनाइ छ।

हाल अग्रवाललाई हिरासतमा राखी विस्तृत अनुसन्धान अघि बढाइएको छ। प्रहरीले यस प्रकरणमा थप संलग्नता र आर्थिक स्रोतबारे गहिरो छानबिन भइरहेको जनाएको छ।