काठमाडौं । नेपाल बैंक लिमिटेडले “स्मार्ट मनी टल्क्स” मूल नारासहित चैत २ देखि ८ गतेसम्म सञ्चालन गरेको ग्लोबल मनी वीक २०२६ कार्यक्रम सफलतापूर्वक सम्पन्न गरेको छ।

संसारभरका युवा पुस्तामा वित्तीय साक्षरता, जिम्मेवार आर्थिक व्यवहार र आर्थिक सशक्तीकरणको चेतना फैलाउने उद्देश्यले मनाइने यस अन्तर्राष्ट्रिय अभियानमा बैंकका सातै प्रदेशस्थित शाखाहरू सक्रिय रूपमा सहभागी भएका थिए।

कार्यक्रमअन्तर्गत विद्यार्थी, युवा तथा सर्वसाधारणलाई बचत गर्ने बानी, लगानीको महत्व, डिजिटल बैंकिङको प्रयोग, ऋण व्यवस्थापन र दीर्घकालीन वित्तीय योजना सम्बन्धी व्यावहारिक जानकारी प्रदान गरिएको बैंकले जनाएको छ।

यस अवसरमा विद्यालय तथा क्याम्पसहरूमा वित्तीय साक्षरता कक्षा, डिजिटल भुक्तानी प्रणालीबारे प्रयोगात्मक तालिम, बचत खाता खोल्ने अभियान, महिला तथा युवा उद्यमी लक्षित उद्यमशीलता कार्यक्रम, प्रभातफेरी, हाजिरीजवाफ प्रतियोगिता र विज्ञ समूह छलफल जस्ता गतिविधि सञ्चालन गरिएका थिए।

बैंकले आगामी दिनमा पनि यस्ता कार्यक्रममार्फत आम नागरिकमा वित्तीय पहुँच, ज्ञान र सचेतना विस्तार गर्दै लैजाने प्रतिबद्धता व्यक्त गरेको छ।