काठमाडौं । नेकपा (एमाले) ले आज काठमाडौंमा प्रदर्शन गरेको छ । पछिल्ला राजनीतिक घटनाक्रम र सरकारको कार्यशैलीविरुद्ध एमालेले राजधानीका विभिन्न स्थानमा प्रदर्शन गर्दै दबाब दिएको हो ।

प्रदर्शनमा एमालेका नेता–कार्यकर्ता ठूलो संख्यामा सहभागी थिए । उनीहरूले सरकारविरुद्ध नाराबाजी गर्दै सुशासन, स्थायित्व र लोकतान्त्रिक मूल्यको संरक्षणको माग गरेका छन् । प्रदर्शनका क्रममा पार्टीका नेताहरूले वर्तमान सरकारले देशलाई अन्योलतर्फ धकेलेको आरोप लगाएका छन् ।

एमालेले शान्तिपूर्ण रूपमा प्रदर्शन सम्पन्न भएको जनाएको छ भने प्रदर्शनका कारण केही समय ट्राफिक व्यवस्थापन प्रभावित भएको थियो । सुरक्षा व्यवस्थाका लागि राजधानीका मुख्य स्थानमा ठूलो संख्यामा सुरक्षाकर्मी परिचालन गरिएको थियो ।