काठमाडौँ । नेकपा (एमाले) का सचिव महेश बस्नेतले कांग्रेसको भित्री विभाजनमा प्रधानमन्त्री सुशीला कार्की सक्रिय रहेको आरोप लगाउँदै तीव्र आलोचना गरेका छन्। शनिबार च्यासलस्थित पार्टी मुख्यालयमा सञ्चारकर्मीसँग कुरा गर्दै बस्नेतले भने, “प्रधानमन्त्री कार्की र अन्तर्राष्ट्रिय शक्तिहरूले कांग्रेसलाई भत्काएर रवि लामिछाने जस्ता व्यक्तिगत खेलाडीलाई बलियो बनाउने षडयन्त्र गरिरहेका छन्।

यो लोकतन्त्रमाथि प्रत्यक्ष आक्रमण हो। कांग्रेस-एमाले कमजोर पारेर शक्ति सन्तुलन तोड्ने यो रणनीति देशका लागि गम्भीर खतरा हो।” बस्नेतले निर्वाचन आयोगको छिटो निर्णय पूर्ण रूपमा कानूनविपरीत भएको र राजनीतिक सेटिङमा गरिएको ठानेको समेत स्पष्ट पारे। उनका अनुसार, कांग्रेस-एमाले कमजोर पार्ने र व्यक्तिगत राजनीतिक फाइदा सुनिश्चित गर्ने यो खेल लोकतान्त्रिक अभ्यास र संविधानको लागि चुनौतीपूर्ण संकेत हो।

“यो देशको लोकतन्त्र र पार्टी संरचनामाथि प्रत्यक्ष हमला हो। हामी यसलाई कडा शब्दमा अस्वीकार गर्छौं,” बस्नेतले थपे।