काठमाडौं । प्रमुख राजनीतिक दलका समानुपातिकतर्फका बन्दसूची उम्मेदवारमध्ये सबैभन्दा बढी नेकपा (एमाले)बाट उम्मेदवारहरूले नाम फिर्ता लिएका छन्। निर्वाचन आयोगका अनुसार आगामी फागुन २१ गते हुने प्रतिनिधिसभा निर्वाचनका लागि पेस गरिएको बन्दसूचीबाट विभिन्न दलका उम्मेदवारले नाम फिर्ता लिने निवेदन दर्ता गराएका हुन्।

आयोगमा दर्ता विवरणअनुसार एमालेबाट पाँच जना उम्मेदवारले समानुपातिकतर्फको बन्दसूचीबाट नाम फिर्ता लिएका छन्। एमालेबाट खस आर्य समूहमा ठाकुरप्रसाद शर्मा र लालबहादुर रावल, आदिवासी जनजाति समूहमा विजयसिंह लामा र हिरुसरा राना, तथा मधेशी समूहमा अंशु सिंह रहेका छन्।

यस्तै, नेपाली कांग्रेसबाट खस आर्य समूहमा ध्रुवबहादुर मल्ल र सृजना मल्लले बन्दसूचीबाट नाम फिर्ताका लागि निवेदन दिएका छन्। नेपाली कम्युनिष्ट पार्टी (नेकपा) बाट मधेशी समूहका अरविन्द दास र कमलराय यादवले पनि समानुपातिक बन्दसूचीबाट नाम फिर्ता लिने प्रक्रिया अघि बढाएका छन्।

यसैगरी, राष्ट्रिय स्वतन्त्र पार्टी (रास्वपा)बाट सुनिता न्हेमाफुकीले पनि समानुपातिकतर्फको बन्दसूचीबाट नाम फिर्ताका लागि निर्वाचन आयोगमा निवेदन दर्ता गराएकी छन्। निर्वाचन आयोगका अनुसार बन्दसूची संशोधन तथा नाम फिर्ता सम्बन्धी प्रक्रिया कानुनबमोजिम भइरहेको छ भने अन्तिम सूची तोकिएको कार्यतालिकाअनुसार सार्वजनिक गरिनेछ।