आजको समय युवाको हो । तर केवल उमेरले युवा हुनु पर्याप्त छैन । सोच, चेतना, जिम्मेवारी र साहसले युवा बन्न सक्नुपर्छ । यही अर्थमा हेर्दा नेपाली कम्युनिष्ट आन्दोलनमा युवालाई आशा, दिशा र आत्मविश्वास दिने नाम हो, अमित लामा ।

साधारण किसान परिवारमा जन्मिएर संघर्षका बीच हुर्किएका अमित लामाको जीवन स्वयं युवाका लागि पाठशाला हो । वि.सं. २०४३ साल मंसिर ८ गते काभ्रे जिल्लाको रोशी गाउँपालिका-१, खहरेपागुमा जन्मिएका उहाँले बाल्यकालदेखि नै समाज, गाउँ र सामूहिक हितलाई आफ्नै भविष्यसँग जोडेर हेर्नुभयो । सुविधाभन्दा जिम्मेवारी रोज्नु, अवसरभन्दा कर्तव्य रोज्नु-यही सोचले उहाँलाई आजको स्थानसम्म ल्याएको हो ।

युवावस्थामै विद्यालय व्यवस्थापन समिति अध्यक्षको जिम्मेवारी सम्हाल्नु सामान्य कुरा होइन । तर अमित लामाले नेतृत्वलाई पद होइन, सेवा हो भन्ने उदाहरण गाउँकै चेतना माध्यमिक विद्यालयबाटै प्रस्तुत गर्नुभयो । शिक्षा सुधार, सामाजिक चेतना र युवाको सहभागिता बढाउने उहाँको प्रयासले देखायो-परिवर्तन ठूला भाषणबाट होइन, साना तर इमानदार कामबाट सुरु हुन्छ ।

राजनीतिक यात्रामा पनि उहाँको बाटो सजिलो थिएन । गाउँ कमिटी संयोजकदेखि पालिकाको उपसंयोजक, क्षेत्रीय कमिटी सदस्य र जिल्लामा तीन कार्यकाल सदस्य हुँदै प्रदेश कमिटी सदस्यसम्मको जिम्मेवारी निरन्तर सम्हाल्नु भनेको केवल संगठनात्मक उचाइ होइन, निरन्तर संघर्ष र विश्वासको परीक्षा हो । उहाँले कहिल्यै पदलाई लक्ष्य बनाएनन्, जनताको भरोसालाई लक्ष्य बनाए । यही कारण उहाँ जहाँ पुगे, त्यहाँ संगठन बलियो भयो र युवाको आत्मविश्वास बढ्यो ।

अमित लामाको नेतृत्व सबैभन्दा प्रष्ट रूपमा युवा संघ नेपालमा देखिन्छ । विभागीय सदस्यदेखि केन्द्रीय सदस्य, कोषाध्यक्षको जिम्मेवारी र लगातार तीन कार्यकाल उपाध्यक्षसम्म पुग्दा उहाँले एउटै कुरा दोहोर्‍याइरहनुभयो-“युवा केवल भीड होइन, परिवर्तनको शक्ति हो ।” रोजगार, शिक्षा, समान अवसर र सामाजिक न्यायका विषयमा युवासँग बहस गर्दै उहाँले हजारौँ युवालाई निष्क्रियताबाट सक्रियतामा रूपान्तरण गर्नुभयो ।

नेकपा एमालेको ११औँ केन्द्रीय महाधिवेशनबाट अत्यधिक मतसहित विजयी हुनु संयोग होइन । यो परिणाम युवाले देखाएको भरोसा, संघर्षको मूल्यांकन र भविष्यप्रतिको आशाको संकेत हो । काभ्रे क्षेत्र नं. १ बाट उम्मेदवारका रूपमा सिफारिस हुनु पनि युवाले खोजेको प्रतिनिधित्वतर्फको सकारात्मक संकेत हो ।

आज धेरै युवा निराशमा छन्-जगार छैन, अवसर सीमित छन्, राजनीति प्रति वितृष्णा बढ्दो छ । यस्तो बेला अमित लामाको यात्रा एउटा सन्देश हो : परिवर्तन बाहिरबाट आउँदैन, हामी आफैँ परिवर्तन बन्नुपर्छ । इमानदारी, अनुशासन र निरन्तर प्रयासले समाज बदल्न सकिन्छ भन्ने उहाँको जीवनले प्रमाणित गरेको छ ।

युवाका लागि नेतृत्व भनेको भाषण होइन, कर्म हो । सत्ता होइन, सेवा हो । सुविधा होइन, जिम्मेवारी हो । यही दर्शन बोकेर अघि बढेका अमित लामा आजका युवाका लागि केवल नेता होइनन् – प्रेरणा हुन्, भरोसा हुन् र सम्भावनाको संकेत हुन् ।

यदि आजको युवा पुस्ताले आफ्नो भविष्य सुरक्षित गर्न चाहन्छ भने, राजनीति र समाज परिवर्तनबाट भाग्नु हुँदैन । जिम्मेवारी लिनुपर्छ, प्रश्न गर्नुपर्छ र इमानदार नेतृत्वलाई साथ दिनुपर्छ । अमित लामाको संघर्ष यही बाटोको प्रमाण हो ।