काठमाडौं । भक्तपुरको मध्यपुर थिमी नगरपालिका–६ राईटोलमा एक व्यक्तिले आफ्नै कन्चटमा गोली हानेर आत्महत्या गरेका छन्। आत्महत्या घटनामा प्रयोग भएको बन्दुक लाइसेन्स प्राप्त रहेको खुलेको छ।

जिल्ला प्रहरी परिसर भक्तपुरका डीएसपी प्रकाश जबेगुका अनुसार घटनामा प्रयोग भएको जिएस-५ जर्मन लेखिएको आधुनिक बन्दुक सूर्यकुमार नेम्वाङको नाममा लाइसेन्स प्राप्त रहेको पाइएको छ।

सो बन्दुक प्रयोग गरी ४० वर्षीय सनिप चाम्लिङ राईले सोमबार दिउँसो करिब साढे ३ बजे आत्महत्या गरेका हुन्। उनी मध्यपुर थिमी नगरपालिका–६ राईटोलस्थित साढे चार तले पक्की घरको चौथो तलामा रहेको कोठामा चुकुल लगाई आफ्नै कन्चटमा गोली हानेको प्रहरीले जनाएको छ।

प्रहरीका अनुसार मृतक राई मानसिक समस्यामा रहेको कुरा उनका परिवारका सदस्यहरूले बताएका छन्। साथै मृतक राई र बन्दुकका लाइसेन्सधारी सूर्यकुमार नेम्वाङ नाताले साला–भिनाजु पर्ने खुलेको छ।

राई अविवाहित रहेको र घटनाका सम्बन्धमा थप अनुसन्धान भइरहेको प्रहरीले जनाएको छ।