काठमाडौं । राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापा चार वर्षपछि आफ्नो मूल पार्टी राप्रपामै फर्किएका छन्। राप्रपा अध्यक्ष राजेन्द्र लिङदेनको नेतृत्व स्वीकार गर्दै राप्रपा र राप्रपा नेपालबीच बुधबार औपचारिक एकता भएको हो।

दुवै दलबीच ६ बुँदे सहमतिपत्रमा हस्ताक्षर गर्दै थापाले नेतृत्व गरेको राप्रपा नेपाललाई राप्रपामा विलय गरिएको छ। सहमतिपत्रअनुसार राप्रपाको २०७८ मंसिरमा सम्पन्न एकता महाधिवेशनबाट केन्द्रीय समितिमा निर्वाचित भई पछि राप्रपा नेपाल रोजेका नेता–कार्यकर्तालाई सोही जिम्मेवारीमा पुनः फर्काइने उल्लेख गरिएको छ।

सहमति अनुसार राप्रपा नेपालको तर्फबाट पदाधिकारी तथा केन्द्रीय सदस्यहरू सहमतिका आधारमा राप्रपाको केन्द्रीय कार्यसमितिमा रहने व्यवस्था गरिएको छ।

त्यसैगरी, २०७८ मंसिरमा सम्पन्न एकता महाधिवेशनको समयमा कायम रहेका वडा, गाउँ, नगर तथा जिल्ला तहका पदाधिकारी र सदस्यहरूलाई सम्बन्धित जिल्लामै सम्मानजनक ढंगबाट व्यवस्थापन गर्दै लगिने सहमतिपत्रमा उल्लेख छ।

एकतासँगै राप्रपाको संगठनात्मक शक्ति थप सुदृढ हुने र आगामी राजनीतिक गतिविधिमा पार्टी एकीकृत रूपमा अघि बढ्ने दुवै पक्षको विश्वास छ।