काठमाडौँ। सडक निर्माणको गति बढाउन सरकारले नागढुङ्गा–नौबिसे मलेखु सडकखण्ड आंशिक बन्द गर्ने निर्णय गरेको छ।

भौतिक पूर्वाधार तथा यातायात मन्त्रालय र सम्बन्धित आयोजनाका अनुसार सडकमा सवारी आवागमन निरन्तर भएकाले निर्माणमा ढिलाइ भएको थियो। यसलाई गति दिन यही मङ्सिर २४ देखि पुस १ गतेसम्म बिहान १०:३० बजेदेखि अपराह्न ३:३० बजेसम्म दैनिक पाँच घण्टा सडक बन्द रहनेछ। सडक बन्दको समयमा काठमाडौँ–नौबिसे जाने सवारीसाधन नागढुङ्गा चेकपोस्टमा रोकिनेछन्। मुग्लिङ–काठमाडौँ जाने सवारीसाधन गल्छी, बैरेनी र मासटारमा रोकिनेछन्। अत्यावश्यक सेवाका सवारी (एम्बुलेन्स, दमकल, सुरक्षा वाहन, शव वाहन) भने ट्राफिक प्रहरीले सहज गर्नेछ।

वैकल्पिक मार्गमा सीतापाईला–भिमढुङ्गा, रामकोट–धार्के, सामाखुसी–टोखा–छहरे सडक प्रयोग गर्न सकिनेछ। रोकिएका सवारीसाधन अपराह्न ३:३० बजेसम्म मात्र यात्रा जारी राख्न सक्नेछन्।