काठमाडौं। आज नेकपा एमालेको सचिवालय बैठक बस्दैछ। बैठक अध्यक्ष केपी शर्मा ओलीको निवास गुण्डुमा बिहान ११ बजेदेखि डाकिएको हो। बैठकको मुख्य एजेण्डा महाधिवेशनको तयारी र जनपरिचालन रहेका छन्।

प्रचार विभाग प्रमुख राजेन्द्र गौतमका अनुसार, सचिवालय बैठक आगामी पोखरा महाधिवेशनको तयारीमा केन्द्रित हुनेछ। महाधिवेशनको क्यालेन्डर, प्रतिनिधि चयनको मोडालिटी, व्यवस्थापन र निर्वाचन तालिका बारे बैठकमा निर्णय लिने योजना बनाइएको छ।

गौतमले नेपाल प्रेससँग भने, “आज क्यालेन्डर, प्रतिनिधिको रेसियो, प्रतिनिधि छनोट मिति र शुल्क जस्ता विषयमा अन्तिम निर्णय हुनेछ।” यसवर्षको महाधिवेशनमा करिब २२ सय प्रतिनिधि चयन हुने प्रारम्भिक अनुमान गरिएको छ। सौराहामा आयोजित १०औं महाधिवेशनमा आयोजकसहित १९ सय प्रतिनिधि थिए।

गौतमका अनुसार, वर्तमानमा एमालेमा ६ लाख ६३ हजार संगठित सदस्य रहेको छ। यसपटक सदस्य संख्या बढेकाले प्रतिनिधि चयनको अनुपात १२ सय सदस्यमा ३ जना प्रतिनिधि हुने खाका बनाइएको छ। यद्यपि, यो अन्तिम निर्णय सचिवालयले नै गर्नेछ।