काठमाडौं । राष्ट्रपति रामचन्द्र पौडेलले देशको हालको राजनीतिक परिस्थिति र आसन्न निर्वाचन तयारीका विषयमा प्रधानमन्त्री सुशीला कार्की, सरकारका मन्त्रीहरू र विभिन्न राजनीतिक दलका शीर्ष नेताहरूसँग आज अपराह्न शीतलनिवासमा छलफल गर्ने भएका छन् ।

राष्ट्रपतिद्वारा आयोजना गरिएको यो बैठक शुक्रबार अपराह्न ४ बजेका लागि तय गरिएको छ। राष्ट्रपति स्रोतका अनुसार छलफलको मुख्य एजेन्डा आगामी निर्वाचनको मिति, तयारी अवस्था, राजनीतिक सहमतिको आवश्यकता र निर्वाचन आयोगसँगको समन्वयमा केन्द्रित रहनेछ ।

यसअघि बिहीबार पनि प्रधानमन्त्री कार्की र केही मन्त्रीहरू शीतलनिवास पुगेर राष्ट्रपतिसँग भेटघाट गरेका थिए। सो भेटमा सरकारका हालका निर्णय, निर्वाचन आयोगसँगको समन्वय र राजनीतिक दलबीच बढ्दो अविश्वासका विषयमा छलफल भएको स्रोतले जनाएको छ।

राष्ट्रपतिले आजको छलफलमा सहभागी दलहरूलाई राष्ट्रिय सहमति र निर्वाचन सुनिश्चिततामा जोड दिन आग्रह गर्ने तयारी गरेको बताइएको छ। शीतलनिवासले यसलाई “राष्ट्रको स्थायित्व र लोकतान्त्रिक अभ्यास सुदृढ पार्ने उद्देश्यले आयोजित नियमित परामर्श” का रूपमा वर्णन गरेको छ।

स्रोतका अनुसार आजको बैठकमा प्रमुख राजनीतिक दलका शीर्ष नेताहरू, मन्त्रीपरिषद् सदस्य र निर्वाचन आयोगका प्रतिनिधिहरू पनि उपस्थित रहनेछन्।
छलफलपछि राष्ट्रपतिले निर्वाचनलाई समयमै सम्पन्न गर्न सबै पक्षको साझा प्रतिबद्धता आवश्यक रहेको सन्देश जारी गर्ने सम्भावना छ।