काठमाडौं । नेपाली कांग्रेसका सभापति शेरबहादुर देउवाले आज दिउँसोका लागि पदाधिकारी बैठक बोलाए पनि उनी स्वयं बैठकमा सहभागी नहुने भएका छन्।

बैठकको अध्यक्षता उपसभापति पूर्णबहादुर खड्काले गर्ने बताइएको छ। बैठक बिहीबार दिउँसो १ बजे, हिमालय होटल, कुपण्डोलमा बस्ने तय गरिएको छ। बैठकमा आगामी २६ असोजमा बस्ने केन्द्रीय समितिको एजेण्डा, महाधिवेशन तयारी, र आगामी निर्वाचन रणनीतिलगायत विषयमा छलफल हुनेछ। पदाधिकारी बैठकले पार्टीभित्र हाल देखिएका असन्तुष्ट धार, संगठन विस्तार, र स्थानीय तहमा देखिएका मतभेद समाधानका विषयमा पनि केन्द्रित हुने जनाइएको छ।

देउवा जेन–जी आन्दोलनपछिका घटनापछि पहिलोपटक औपचारिक कार्यक्रमका लागि बोलाइएका भए पनि, उनी व्यक्तिगत कारण देखाउँदै बैठकमा उपस्थित नहुने भएका हुन्। उक्त आन्दोलनका क्रममा भदौ २४ गते देउवा र उनकी पत्नी आरजु राणा माथि आक्रमण भएको थियो, जसपछि देउवा लामो समयदेखि सार्वजनिक कार्यक्रममा देखिएका छैनन्।

बैठकमा महासमिति बैठकको तयारी, अधिवेशन मिति टुंग्याउने कार्यदलको प्रतिवेदन र संगठन सुदृढीकरणका विषयमा विस्तृत छलफल हुने अपेक्षा गरिएको छ।