काठमाडौं। अर्थ मन्त्रालयले आजदेखि आफ्ना सबै प्रकारका टिप्पणी तथा निर्णय प्रक्रिया पूर्णरूपमा डिजिटल स्वीकृतिबाट मात्र सञ्चालन गर्ने भएको छ।

अर्थमन्त्री रामेश्वर खनालले सामाजिक सञ्जाल फेसबुकमार्फत मन्त्रालयले कामलाई छिटो, पारदर्शी र सुरक्षित बनाउन कागजी प्रक्रियाको साटो डिजिटल प्रणाली पूर्णरूपमा लागू गरेको जानकारी दिएका छन्। उनका अनुसार अब आन्तरिक फाइलिङ, टिप्पणी तथा स्वीकृति लिन दिने कार्य अनलाइन प्लेटफर्ममार्फत मात्र हुने छ। यसले समय, लागत र श्रम बचतका साथै निर्णय प्रक्रियामा पारदर्शिता बढाउने अपेक्षा गरिएको छ।

मन्त्रालयले जनाएको छ कि डिजिटल स्वीकृति प्रणालीको कार्यान्वयनसँगै कर्मचारीले हातले गर्ने प्रक्रिया अन्त्य हुनेछ र सम्पूर्ण रेकर्ड सुरक्षित रूपमा डिजिटल आर्काइभमा राखिनेछ।